O BNG de Viveiro insta ao Sergas a crear unha cuarta praza médica de tarde no Centro de Saúde

O BNG de Viveiro insta ao Sergas a crear unha cuarta praza médica de tarde no Centro de Saúde

O Servizo Galego de Saúde (Sergas) publicou a principios de 2007 un informe titulado Plan de Mellora da Atención Primaria en Galiza, no que se estabelecía unha cota base por médico de 1.250 pacientes, para dese modo garantir unha mellor atención sanitaria á poboación. Con todo, os obxectivos marcados nese plan foron eliminados polo goberno de Feijóo. Semergen e outras sociedades científicas, fixan nun ideal de 1.300 e que nunca debería superar os 1.500.

O SERGAS afirma que en Galiza a media de pacientes por médico en Atención Primaria está en 1.282 tarxetas por cada facultativo, algo que se incumpre en Viveiro. No Centro de Saúde de Viveiro incúmprese na quenda de tarde onde mesmo hai facultativos con máis 1.800 pacientes na súa cota.

“Na quenda de tarde hai actualmente 4.714 cartillas, tres facultativos e dous cupos pechados”, sinalan os nacionalistas de Viveiro.

“Por todo o anterior e sabedores de que o SERGAS é coñecedor da situación, pedimos a creación dunha cuarta praza médica para o noso centro médico para así garantir unha mellor atención sanitaria e evitar a sobrecarga asistencial”, afirman.

 

Plan para a atención primaria en cinco medidas

Para a fronte nacionalista é fundamental rescatar a Atención Primaria e propón un plan que recolle cinco medidas concretas:

  1. Incrementar o número de profesionais das diferentes categorías para acabar coa masificación dos cupos, de tal xeito que cada facultativo teña unha cota base de 1.250 tarxetas sanitarias., e nunca superior a 1.500.
     
  2. Mellorar os equipamentos no centro de saúde.
     
  3. Suprimir as limitacións ás probas diagnósticas por parte do persoal de atención primaria.
     
  4. Cobertura do 100% das ausencias e baixas dende o primeiro día.
     
  5. Poñer en marcha un proceso de formación que se adapte ás necesidades reais do SERGAS.


“O Bloque de Viveiro ten claro que hai que reverter a situación de recortes e de privatizacións consumada polo PP ao longo dos últimos anos e quere mostrar a súa preocupación pola deterioración da Sanidade Pública en Viveiro resultado da política de recortes, desmantelamento e privatizacións levadas a cabo pola Xunta presidida por Núñez Feijóo”, conclúen.

comentarios